«Ուժեղ Հայաստանը» վաղը հավաքվում է դատարանի մոտ․ պահանջում են ազատել Սամվել Կարապետյանին

«Ուժեղ Հայաստան» կուսակցությունը հայտարարություն է տարածել՝ կոչ անելով քաղաքացիներին վաղը՝ ապրիլի 15-ին, ժամը 12:00-ին, հավաքվել Հակակոռուպցիոն դատարանի շենքի մոտ։ Ակցիայի հիմնական նպատակն է պահանջել Սամվել Կարապետյանի ազատ արձակումը։

Կուսակցության ներկայացուցիչները վստահ են, որ գործող իշխանությունները վախենում են ժողովրդական ընդվզումից։ «Իշխանությունը վախենում է, որ դու այնտեղ կլինես… բայց դու կլինես»,- նշված է տարածված հաղորդագրության մեջ, որտեղ կոչ է արվում վերջ դնել «բռնապետությանը»։

Թեմայի շուրջ իր կարծիքն է հայտնել նաև կուսակցության անդամ Ալեքսան Ալեքսանյանը։ Նա շեշտել է, որ Նիկոլ Փաշինյանն այլևս չի տիրապետում իրավիճակին, իսկ իշխանությունների փորձերը՝ վախեցնել ընդդիմադիրներին, անօգուտ են։ «Մեզ վախեցնել չեն կարող, վախեցողն իրենք են»,- հայտարարել է Ալեքսանյանը։