«Ռոսիա» տոնավաճառը փակում են. առևտրականները Սուքիասյանին «բրատով» են դիմում

Երևանի կենտրոնում իրավիճակը թեժ է։ «Ռոսիա» տոնավաճառի աշխատակիցներն այսօր առավոտյան բողոքի ակցիա են սկսել՝ ընդդեմ սեփականատեր Սուքիասյանների ընտանիքի որոշման։ Մարդկանց վերջնաժամկետ է տրվել մինչև մարտի 15-ը ազատել տարածքները, քանի որ տոնավաճառը պետք է քանդվի, իսկ դրա փոխարեն հարակից մոլը կընդլայնվի ու կդառնա զվարճանքի կենտրոն։

«Բռա՛տ, կորցնելու բան չունենք էլ»,- դիմելով մոլի ներկայացուցչին՝ ասել է առևտրականներից մեկը։ Մարդիկ վրդովված են, որ տարիներով աշխատել ու զարգացրել են այս բիզնեսը, իսկ հիմա իրենց ուղղակի «դուրս են շպրտում»։ Շատերը վարկեր ունեն ու չգիտեն՝ ինչպես են փակելու դրանք, եթե զրկվեն իրենց ապրուստի միակ միջոցից։

Ըստ շրջանառվող լուրերի՝ տարածքները ազատում են բրենդային խանութներին տալու համար, իսկ փոքր ու միջին ձեռնարկատերերին առաջարկում են տեղափոխվել այլ տոնավաճառներ, ինչին նրանք կտրուկ դեմ են։ Ակցիայի մասնակիցները հայտարարում են, որ պայքարելու են մինչև վերջ։